How i Bleached my hair at home safely💕 | تجربتي لسحب لون شعري وصبغه للآشقر با البيت بدون ما يتضرر
How i Bleached my hair at home safely | تجربتي لسحب لون شعري وصبغه للآشقر با البيت بدون ما يتضرر !!
مسا الخير .. وحشتوني 💕 قبل الموضوع آشتركوا با البلوق وتابعوني بمواقع السوشيل ميديا
اليوم موضوعي عن مراحل صبغة شعري لون شعري با الاساس اسود غامق وانا من النوع اللي احب احط حنا واحب لونها ( الغجري - Burgundy ) وريحتها با الشعر واحط مع الحنا مكونات تخليها تصبغ مثلاً ( شاي- غجر- نسكافيه - ليمون) وما تتخيلون مع التفتيح كيف صبغة لون الاحمر من الحنا م راحت والى الان واضح بس محد يلاحظها الان خف اللون من التفتيح ، قبل لا ابدآ بآي شي او اقرر افتح شعري قريت مواضيع كثير و تجارب بنات با الصالونات بنات سعوديات وطرق تفتيح الشعر من بلوقرز اجانب با اليوتيوب ومن 2017 وانا من فتره لفتره اقرآ تجارب البلوقر السعوديات ومرا آستفدت منها عشان م اغلط بشي وبحط لكم الروابط عشان اللي يبي يستفيد ...
-
-
( هاذي المواضيع اللي استفدت منها شخصياً ورجعت لها اكثر من مرا )
كنت خايفه من الصالون ولا افكر فيه الان سمعت وشفت بنات فتحوا شعورهم وكانت قوة الاكسجين عاليه وطاح شعرهم قدام عيني ومن خوفي قلت لازم اثقف نفسي بها المجال وابدا علطول وكانت مشاعري ميكس خايفه بس متحمسه اكثر ... قبل لا تبدآين بآي شي لازم تكونين عارفه اللون اللي تبينه وتكون عندك صور وتشوفين اللي يناسب لون بشرتك وانا كنت ابي اشقر زيتوني بس عارفه ان شعري اسود مب بسرعه يبان اللون لازم امر بمراحل سحب اللون بقوة ٢٠ اللي هي تعتبر اقل قوة ، اكثر من مرا عشان التفتيح يكون با التدريج و الضرر يكون اخف وبعدها بيصبغ اللون اللي ابيه
فا البدايه بعد م جمعت المعلومات و اللون اللي ابيه رحت للدمام معروفه محلات تجهيز الصالونات موجوده هناك واسم المجمع ( عماره المعجل) اخذت من محل صبايا علبه تفتيح الشعر قوة ٤٠ و ٢٠ بس م استخدمت الاربعين الانه قوي كل شغلي على ٢٠
و البودرة من محل ثاني نسيت اسمه و كريزي كلورPlatinum ب ٢٥ ريال عشان احطه بعد سحب اللون وكليبسات للشعر وكمامات+ قفازات
رجعت للبيت خلطت الاكسجين السايل قوة ٢٠ نص العلبه مع الاكسجين البودر كيس واحد القوام لازم يكون ثقيل شوي ، ولازم كل شي تستخدمينه يكون بلاستيك قسمت شعري وزعته ع كل خصله من شعري بديت من قدام وهاذي غلطتي الاولى مفروض من ورا بعدين من قدام وخليته لمده اقل من عشر دقايق مفروض اقل مده عشان م يحترق الشعر وضروري تشيكين ع شعرك كل دقيقه وغلطتي الثانيه اللي سويتها بديت با الجذور و الجذور تصبغ بسرعه مفروض ابدا با الاطراف بعدين الجذور انتبهوا لها النقطه ، لمن غسلت شعري لاحظت الاطراف لسى فيها لون احمر وشعري كان لونه من الجذور برتقالي صارخ بس م خرعت نفسي و آنهرت الاني عارفه بيطلع لي كذا ولازم اسحب لون ثلاث مرات با الكثير عشان اوصل اللون اللي ابيه ، حطيت الكريزي كولور العلبه كامله ع كل شعري وسويت مساج عشان يتوزع اللون لمده ساعه وغسلته م بان لي ولا اي درجه لون رمادي ، بعدها يومين قضيتها استخدم ماسك الشعر عشان يرطب لي اياه ويعوضه ويرتاح الان التفتيح ينشف و يقطع الشعر وسويت ماسك المايونيز عشان يرطب اكثر
اخذت ماسك من التميمي ١٨ ريال مكتوب انه يستخدم بعد سحب اللون وتحمست اخذه و المعروف انه لو صبغتي شعرك آشقر م تستخدمين زيوت نهائياً واستخدمي ماسكات بقوام الزبده الان الزيت يغمق الشعر وينزل لون الصبغه اسرع
بعد يومين من الترطيب رجعت آسوي رينساج لشعري وحطيت (نقطه لون آخضر وشامبو البنفسجي واكسجين ٢٠)
ع اساس يسحب اللون النحاسي خليته عشرين دقيقه فتح لون شعري بس م راح الاورنج ... قلت بعد يومين برجع اسوي سحب لون وما كفى البودر و رحت محل صبايا با السويكت اخذت بودر و اكسجين سايل قوة ٢٠ اقل قوة لسحب اللون
فا البدايه كنت افكر عشان يشيل اللون النحاسي بعد سحب اللون لازم لون ازرق جربته م نفع ولا بين شي ، بس بعدين لمن رجعت للمحل عشان اشتري الاكسجين السايل الانه خلص، سئلني اي لون تبين تصبغين قلت اشقر زيتوني قال حطي نقطه قد معجون الاسنان من الاخضر مع البودر والسايل قوة ٢٠ اخلطيهم وخليهم خمس دقايق ونصحني برضوا با الشامبو البنفسجي عشان يحافظ على اللون الاشقر ويشيل اللون النحاسي المزعج
بعد سحب اللون الاحمر لسى موجود با الاطراف صار من الجذور درجة الشقار اللي ابيها و الاطراف بقايا الحنا فيه لسى استنيت اسبوع وسويت سحب لون بقوة ٢٠ مع البودرة ، وكني رضيت با النتيجة وجى الوقت اللي اصبغ شعري فيه استخدمت غارنييه الانها بخلاصه الافوكادو و الزيت زيتون معروفه اقل ضرر للشعر وحطيت معها نقطه لون ازرق خليته ٤٥ دقيقه وغسلته ولا كاني صبغت شي !!!
انقهرت وقلت اروح لوحده شاطره خلاص انا سحبت لون شعري جاهز والحمدلله ي رب شعري م تضرر كثير كان الضرر اقل والصبغة م افهم فيها نهائياً دقيت ع صالون با العقربيه عند وحده متخصصه با الصبغ اسمها مريم بصالون جاردينيا كلمتها شخصياً وحجزت عندها آختي اللي دلتني عليها من وحده مدحتها وجت فوقتها ، جى الموعد رحت لها و شافت شعري قالت لازم شوي سحب لون عشان بقايا لون الحنا اللي با الاطراف يعني صاروا اربع مرات سحب لون بس الانه بمراحل صار الضرر آقل بكثير ، قلت اوك و وريتها صورة اللون اللي ابيه وانا كنت واثقه ومرتاحه الان حسيتها عارفه وفاهمه وش تسوي ، و من كثر الصالونات كنت خايفه اروح لآي شي و استسلم ، و غير كذا شعري كان فاتح للدرجة المطلوبه بس يحتاج احد بروفشنال با الصبغ وكانت قد المهمه ماشاءالله عليها، سويت سحب لون للآطراف مدة نص ساعه غسلته وحطت لي الصبغة ع الاطراف و بعد ٣٠ دقيقه حطت ع جذور الشعر الصبغة الانها تصبغ اسرع و اول م غسلته كان اشقر زيتوني غامق بس بعد كم يوم فتح وزان اللون الحمدلله
(هنا بعد اول سحب لون عسلي فاتح با الكام)
(هاذي النتيجه النهائيه با الكام )
وهنا صورتين لشعري بكاميرا الجوال و اللون هنا اقرب للواقع ♥️ اشقر زيتوني وكآنه مخصل ثلجي و رمادي ( اللون الاشقر يجي بآ كثر من ثلاث الوان ويتغير مع الاضاءات)
( هذا اللون اللي كنت حاطته فبالي بس شعر مايا الاندرتون افتح على ثلجي )
بنهاية انا مبسوطه با النتيجه وناويه افتحه اكثر واصبغه اشقر رمادي !!!! 😍 و دام انه فاتح يعني متاح لي اصبغه اي لون ابي 🙏🏻 وصدقوني التغيير حلاته انتي بنفسك تسوينه مش تروحين لاحد يسويه لك مش ذم بصالونات بس انا اتكلم عن شعور التغيير نفسه لازم كل احد يجربه وصدقوني انا اكثر وحده كنت خايفه ع شعري يتدمر بس لمن تثقفت اكثر عن الموضوع و الطريقه جتني الجرآه آكثر ، و انا م اقول ان شعري خالي من اي ضرر بعد سحب اللون و الصبغ فقد حيويته اكيد بس م تقصف وطاح او ماعت الشعره حسيت انه غلب عليه الجفاف و اللمعه خفت وهذا شي طبيعي يتعوض بواحد لتر من الماء يومياً وفيتامينات ترجع للشعر صحته وهذا اللي النظام اتبعه حالياً 👏🏻❤️
دمتم بحب ولو آستفدتوا من تجربتي علقوا وآنشروا التدوينه ❤️❤️💁🏼
تعليقات
إرسال تعليق